وجه الصحفي عبداللطيف فوزي الشكر للمستشار مرتضى منصور بعد ان قام ببذل جهد كبير لسرعه الإفراج عنه بعد مباراة الزمالك والاسماعيلي.
وكتب عبداللطيف عبر صفحته الشخصية فيسبوك «حابب أوجه الشكر للمستشار مرتضى منصور رئيس نادي الزمالك حرص على الأطمئنان عليا، واللي عرفته إنه بذل مجهود كبير مع المسؤولين بتدخله لحل سوء التفاهم اللي كان حاصل
ومن هنا حابب اشكر سيادتة جدا على وقفته معايا.. واللي مش غريبة عليه … وأشكر كل الناس اللي بعتتله علشان يدخل ويساعد في حل الموضوع، واشكر المستشار محمود العسال ودايما أبناء الزمالك خلف الجميع الف شكر»
وكان الصحفي عبداللطيف فوزي قد نشر عبر صفحته الشخصية فيسبوك كواليس القبض عليه بعد مباراة الزمالك والاسماعيلي في كأس مصر.
حيث كتب عبر صفحته الشخصية فيسبوك:
« الحمدلله والشكرلله أنا بخير وكله تمام ومحصلشي أي حاجة.. أنا خرجت من شوية
حابب أشكر كل الناس اللي ساعدت واللي سألت عليا وبعتذر لو مش عارف أرد على حد
الموضوع كان يخص الكورة وشغلي كصحفي وكتباباتي وتغطيتي للأحداث الأخيرة.. ومن الواضح إن حصل سوء تفاهم وأنا وضحته للسادة المسؤولين وتم حلها الحمدلله
حابب بس أشكر السادة المسؤولين اللي حققوا معايا، على التعامل المحترم ( للدرجة أنهم جابولي الأدوية بتاعتي كلها ) وعلى سعة صدرهم أثناء التحقيق، والحمدلله تم إيضاح كافة التفاصيل ليهم لأثبات إني معملتش أي حاجة
تاني الحمدلله أنا كويس وبشكر كل الناس اللي أهتمت وكتبت على السوشيال ميديا علشان تتضامن معايا.. كلكم فوق رأسي ألف شكر.
وكان والد الصحفي قد نشر عبر صفحته الشخصية أنه تم القبض عليه بالأمس دون معرفة السبب الرئيسي وراء ذالك
حيث كتب «يعنى بالذمة دة كلام اكون نايم اقوم اكد زوجتى بتصرخ لان زوار الفجر هجمو على البيت ودخلو غرفة ابنى المهندس عبد اللطيف فوزى وخدو اللاب توب والهادر ديسك وركبوة البوكس ومشيو ونزلت وراهم وانا مريض سكر وضغط واعصاب وانا مش قادر امسك اعصابى ووقعت وانا طالع من الاسانسير
ومعرفتش هم خدوة فين ؟
ويوجد فى اسفل البرج ال انا ساكن فية امن لمساعد وزير الداخلية الذى يسكن فى البرج معنا وسالتهم قالو دول امن وطنى ولو روحت هناك مفيش حد هيدخلك وانا حاليا تعبان ومتوتر ومش عارف اعمل اية ..علما بان ابنى عبد اللطيف ملوش فى السياسة نهائى ولكنة مهتم بالرياضة لانة زمالكاوى وتقريبا الموضوع لة علاقة بزمالك وهو ليس تبع التراس ولا اى مجموعة مشاغبة ومش عارف خدوة لية
علما بان ابنى عبد اللطيف مريض بالضغط والقلب ولم يتناول دوائة حتى الان وممكن يحصلة مكروة عندهم وانا احملهم المسؤلية لو حدث لة مكروة لاقدر الله»