كنت واثق النهاردة جداً من تسجيل زيزو لأكثر من هدف
و كان قاعد ورايا اتنين من جمهور الزمالك سألوني لما زعلت
ع كرة زيزو إلي أداها ل الجزيري جاب الجول التالت
و قالولي زعلان ليه .. ما هي جت جول
زعلي كان عشان كنت عايز زيزو يحقق هاتريك النهاردة و قد كان الحمدلله لأن هيبقي أول هاتريك لي مع الزمالك و كمان هيبقي تاني هاتريك في الدوري الموسم ده بعد هاتريك ناصر ماهر الوحيد مع فيوتشر و بما إن المنافس مكانش بالمستوي القوي .. و زيزو بينافس ع لقب هداف الدوري إلي أعتقد حسمه ب هاتريك مباراة المقاصة ف ليه لأ مطمعش
إنه يجيب هاتريك و سوبر هاتريك كمان
انا من الناس المتيمين ب لغة الأرقام و الاحصائيات و تحقيق الأرقام القياسية لكل ما هو زملكاوي ف هنسرد مع بعض كده شوية معلومات عن لقب هداف الدوري المصري عبر تاريخ المسابقة و إلي ابتديت موسم ١٩٤٨ / ١٩٤٩ و إلي حقق لقب الهداف في الموسم ده هو الكابتن محمد دياب العطار ( الديبة ) لاعب نادي الإتحاد السكندري و تقاسم معه لقب الهداف ايضاً في ذلك الموسم كابتن السيد الضظوي لاعب المصري البورسعيدي برصيد ١٥ هدف لكل منهم
تعالا نشوف مع بعض لو زيزو كسر حاجز ال٢٠ هدف
هيحصل ايه و لو تخطي رقم محمد شريف ب ٢١ هدف الموسم الماضي .. لغة الأرقام هتقولنا ايه
١ – لم يحرز لاعب من الزمالك لقب هداف الدوري المصري منذ موسم ٢٠١٠ – ٢٠١١ عندما حصل عليه شيكابالا مناصفه مع مهاجم نادي إنبي أحمد عبد الظاهر برصيد١٣ هدف لكل منهم
٢ – في حالة أحرز زيزو ٢٠ هدف خلال هذا الموسم هيكون دخل ضمن أفضل هدافي للدوري المصري عبر التاريخ
إلي أحرزو ٢٠ هدف فيما فوق في موسم واحد
و هما كالآتي
١ – محمود عبد النبي لاعب نادي الترسانه – ٢١ هدف
موسم ١٩٥٣ – ١٩٥٤
٢ – حمدي عبد الفتاح لاعب نادي الترسانه – ٢٢ هدف
موسم ١٩٥٧ – ١٩٥٨
٣ – مصطفي رياض لاعب نادي الترسانه و حققه موسمين
موسم ١٩٦١ – ١٩٦٢ برصيد ٢٠ هدف
و موسم ١٩٦٣ – ١٩٦٤ برصيد ٢٦ هدف
٤ – كابتن حسن الشاذلي الهداف التاريخي للدوري المصري
و الي محقق رقم لم يتم تخطي حتي الآن و هو ٣٤ هدف
في موسم ١٩٧٤ – ١٩٧٥ و هو رقم تاريخي مسجل بإسمه حتي وقتنا هذا
و حقق كمان لقب هداف الدوري المصري ب رصيد ٢٠ ف أكثر
في موسم ١٩٦٢ – ١٩٦٣ ب ٢٩ هدف
و موسم ١٩٦٤ – ١٩٦٥ برصيد ٢٣ هدف
٥ – عبد الحليم علي عندليب الزمالك موسم ٢٠٠٣ – ٢٠٠٤
برصيد ٢٠ هدف
٦ – حسام باولو لاعب الداخلية موسم ٢٠١٤ – ٢٠١٥
برصيد ٢٠ هدف
٧ – محمد شريف لاعب النادي الأهلي موسم ٢٠٢٠ – ٢٠٢١
برصيد ٢١ هدف و هو اكبر معدل تهديفي احرزه لاعب في موسم منذ أن أحرز كابتن حسن الشاذلي ٣٤ هدف موسم ٧٤
و من الأرقام دي نستنج عدة أشياء على زيزو أن يضعها
نصب أعينه و العمل على تحقيقها ليختم هذا الموسم الإعجازي ب أفضل شكل ممكن
في حالة احراز زيزو ل ٢٠ هدف هيدخل قائمة أفضل هدافي الدوري المصري احرازاً للاهداف عبر التاريخ
لو نجح في كسر رقم محمد شريف ب ٢١ هدف هيكون صاحب أكبر معدل تهديفي في موسم واحد بعد كابتن حسن الشاذلي موسم ٧٤ ٧٥
يعني بنتكلم في حوالي آخر ٣٦ دوري اتلعبو زيزو هيكون هو أكثر هدافي الدوري تسجيلاً للاهداف في موسم واحد
ده بجانب إنه هيكون صاحب أكبر مساهمه للاهداف في موسم واحد لو زادت حصيلته من الأهداف و الاسيستات
و ده إلي كنت بتكلم في مع أصدقاء المدرج الزملكاوي
لما قالولي زعلت ليه عشان أداها للجزيري يجيبها جول
تحقيق لقب الدوري هو الأهم بالتأكيد و لكن ليه مكونش طماع و أحقق الدوري و كمان معاهم لاعيب من عندي ياخد لقب الهداف و يكسرله كام رقم قياسي و التاريخ يذكره
و بالتالي أسمي كنادي هيتذكر و ادينا اهو في ٢٠٢٢
و بنتكلم ع كابتن حسن الشاذلي إنه الهداف التاريخي للدوري المصري و صاحب أعلي رقم تهديفي أحرز في موسم واحد و محدش عرف يكسر رقمه ده حتي وقتنا هذا
الزمالك حقق لقب هداف الدوري المصري ١١ مرة وإحرازة للقب هداف دوري هذا الموسم يصل ل المرة ال١٢
فالنهر لا يغيير مجراه .. و التاريخ لا يغيير مساره ..
و الكل لازم يعرف قيمة الزمالك و مقداره ..
