أعلن اللاعب محمد عادل أمو لاعب نادي مصر المقاصة عن إبتعاده عن كرة القدم في هذه الفترة بسبب مواقف حدثت من أندية المصري والإسماعيلي.
وجاء ذلك عبر مواقع التواصل الإجتماعي على صفحته الشخصية على الفيسبوك.
وكتب محمد عادل أمو قائلًا :
فاضل ساعات على القيد وأنا مخلصتش في أي مكان بعد ما مضيت في فرقتين مصري وإسماعيلي وكنت بتعامل مع كل الناس بثقة كبيرة جدًا مضيت للمصري وفضلت منتظرهم يدفعوا شيكات النادي ويخلصوني.
انا مضيت للمصري قبل كابتن إيهاب ما يمسك الفرقة أول حاجه قولتها لوكيلي بعد كابتن إيهاب ما بقى المدير الفني قولتله أنا مستعد أتنازل عن أي حاجه بس أروح مع كابتن إيهاب، أي حد يعرفني يعرف إني بحب كابتن إيهاب جلال جدا جدا وإن كابتن إيهاب أكتر واحد ساعدني في حياتي.
قعدت أكتر من أسبوعين منتظر المصري يدفع الشيكات لما حسيت إن مبقاش في إهتمام من المسؤولين في المصري، كلمت وكيلي قولتله هروح أي مكان تاني قالي الإسماعيلي عايزك وأنا بحب الإسماعيلي جدا جدا وافقت على طول وقعدت مع البشمهندس يحيى الكومي ومضيت واتفقت على فلوسي وكانت المشكلة فلوس النادي بس عملت كل حاجه ممكن أعملها قالولي هتستنى على فلوسك عشرين يوم.
قولتلهم مفيش مشكلة عادي إدفعوا فلوس النادي وخلصوني واحنا مش هنختلف على أي حاجه اللي حضراتكم عايزينه أنا هوافق عليه عشان أحقق حلم من أحلامي وألعب في النادي الإسماعيلي، كنت مستعد أعمل أي حاجه عشان الموضوع يتم، خلينا النادي بتاعي يوافق على إنه ياخد الفلوس أقساط مع إن النادي في ظروف صعبة ومحتاج كل جنيه يدخل النادي يكون كاش عشان يقدر يحل أزمته ويفك القيد، عملت كل حاجه عشان الإسماعيلي يطلعوا شيكات النادي وكانت كل حاجه فعلا كويسة آخر يوم في القيد قالوا لوكيلي مش هنقدر نخلص عشان مفيش في النادي فلوس !
أنا حاليًا مروحتش نادي، كلمت كل أندية الدوري كل الأندية قفلت القائمة بتاعتها، ربنا يسامح كل الناس اللي كانت سبب في اللي أنا وصلتله ده، أنا قررت ملعبش كورة مرة تانية وبشكر كل الناس إللي حاولت تساعدني، وأتمنى ميكونش فيه أي شخص زعلان مني، وبشكر كابتن وليد هويدي والنادي بتاعي ربنا معاكوا ويوفقكم وإن شاء الله تصعدوا مرة تانية.
أنا واثق جدا إن إللي حصلي ده خير وراضي جدا لكن لأسباب شخصية أنا مش هقدر ألعب كورة مرة تانية.
والجدير بالذكر أن اللاعب يبلغ من العمر 23 سنة وصرح أنه سيبتعد عن مجال كرة القدم بعد عدة أمور حدثت معه.